Ol caàl e ‘l àsen  -  il cavallo e l’asino
Ün àsen ü dé l’éra ‘nsèma a ü caàl, e ‘l caàl l’éra ü malgüstùs e ün egoista de prima qualità. Basta dì che lü l’gh’ia sö apéna la sò bèla bardadüra, e ‘l àsen invéce l’éra tat cargàt che l’ghe riàa apéna a stà ‘n pé.
Dopo de ì caminàt impó, ol àsen, stöf trebatìt, co i öcc fò del có, a l’dis: “Ötem a portà ‘mpó de ròba… mé, gh’la fó piö!.. s-ciòpe prima de rià ‘n sità… Se te n’pórtet la metà, per té l’è quase ü zöch…”
Ol caàl a l’gh’à facc sö ü sguerségn, come per diga:  rànget!; ma dopo ün óter tòch de strada ol asnì l’è treecàt zó per tèra e l’gh’è piö riàt a leà sö: l’à seràt zó i öcc e l’è restàt lé sèch. E alura l’sét cósa l’gh’è söcedit al caàl? L’à düsit portà lü töta la ròba del àsen, e pò a’ l póar asnì mórt.
Insóma: in de éta l’è mèi vötàs; e pò l’pöl capità che s’gh’avie di bröte conseguènse per chèl che s’à mia ülìt fà. (per mia òia o per egoismo).

 



Il cavallo e l’asino
Un giorno un asino camminava a fianco di un cavallo scontroso ed egoista di prima qualità. Basti pensare che portava solo la sua bella bardatura mentre l’asino era così carico che riusciva a malapena a stare in piedi.
 Dopo un tratto di strada l’asino, stanco e con gli occhi fuori dalle orbite, gli dice: “Aiutami a portare un po’ di roba, da solo non c’è la farò ad arrivare fino in città, se porti metà della roba per te sarà un gioco”.  Il cavallo gli fece una smorfia come per dire: arrangiati!; ma dopo un’altro pezzo di strada l’asino stramazzò per terra e non si rialzò più. Allora sapete che cosa successe al cavallo? Ha dovuto portare lui tutta la roba dell’asino e anche il povero asino morto.
In conclusione: nella vita è meglio aiutarsi, perché può capitare di avere brutte conseguenze per quello che non si è fatto (per poca voglia o per egoismo).

 


dalmine, luglio 2009